Wukubłanske lěhwo na

wujednawarja zwadow

Streitschlichtercamp

(03/2018)





foto

Wot 21. – 23.03.2018 přebywachu pjeć šulerki 6. a 8. lětnika Serbskeje wyšeje šule „Michał Hórnik“ Worklecy we wosebitym wukubłanskim lěhwje w Papstdorfje. Tam wukubłachu so na wujednawarja zwadow, zo bychu sobušulerjam pomhali, konflikty wujednać a samostatnje rozrisać. Je to wosebity peer-to-peer přistup, kotryž wukmani dźěći, rozestajenja bjez pomocy dorosćenych rjadować. W měšanych skupinach wuknychu na přikład, što konflikty wučini, što wjedźe mjez čłowjekami k njedorozumjenjam, kak móža tym zadźěwać a kak hodźi so napjata situacija z wotpowědnej komunikaciju pozitiwnje wobwliwować. Program bě naročny a žadaše sej wot dźěći dobru disciplinu a wutrajnosć. Wotměnu skićachu skupinske hry a zwučowanja. Na kóncu wukubłanja złožichu ertne pruwowanje a smědźachu so přez wopismo wjeselić. Šulska socialna dźěłaćerka Rěčneho centruma WITAJ, Franciska Zopic dźěći w lěhwje přewodźeše. Wona wjedźe projekt na šuli dale. Po jutrach chce šulerki dale wukmanić a projekt wujednawarja zwadow na šuli we Worklecach etablěrować.
W přestawkach a na wječoromaj mějachu dźěći składnosć, šulerjow druhich šulow zeznać a tak nowych přećelow zdobyć. Na nócnym pućowanju dopokazachu hólcy a holcy swoju zmužitosć a wuwědomichu sej dowěru do swójskich zamožnosćow.
Fachowa wuměna mjez šulskimi socialnymi dźěłaćerjemi a angažowanymi wučerjemi přinošowa tohorunja k poradźenju třidnjowskeho zarjadowanja.
Cyłkownje wobdźělichu so na wukubłanskim lěhwje w dźěćacej a młodźinskej wjesce ERNA 78 šulerjow z cyłkownje 16 šulow z cyłeje Sakskeje. Zarjadowar wukubłanskeho lěhwa, Sakski krajny hamt za šulu a kubłanje, projekt hižo wjacore lěta podpěra.    
foto


tekst a foće: F. Zopic