Šulerjo so zeznali -

Kennenlernwoche

(08/2018)





wobraz

Nowe šulske lěto je so započało, a tak su tež we Worklečanskej wyšej šuli dźěći do 5. lětnika. Zo bychu so mjezsobu lěpje zeznali a do cyłka zrostli, přewjedźechu w prěnim šulskim tydźenju tak mjenowane zeznawanske dny. Dohromady 43 šulerjow nawjedujetej w dwěmaj rjadownjomaj wučerce Katka Bukowa a Marlena Smolina. Tydźeń bě wupjelnjeny z pučowanskimaj dnjomaj, z přebytkom na Smolic statoku w Hórkach respektiwnje na rybarskim dworje w Małym Holešowje, z přihotami za wučbu a z tójšto pokiwami a informacijemi.

Wutoru pućowachu šulerjo do Pančic-Kukowa, zo bychu so w zežiwjenskej a zelowej zahrodźe pod nawodom Raphaele Wićazoweje ze wšelakimi zelemi a jich hojenskej mocu zeznajomnili, čerstwe całty napjekli a je ze samoměšanej zelowej butru woptali.

Paralelka, kotraž přebywaše dwaj dnjej w Małym Holešowje, zhoni w bliskim Njeswačidle zajimawostki wo ptačkach a da so hnydom do jich picowanja. Dale wuspytachu hry, kotrež běchu starši, dźědojo a wowki hižo hrali. Wutoru popołdnju přimachu so tež tu ćěsta a napječechu slódny chlěb za sebje a staršich.

Šulerjow w Hórkach wodźeše wjesnjan Rüdiger Žur po skale a rozkładźe jim, kak běchu tu ludźo něhdy dźěłali. Zajimwawi běchu za dźěći tež pólscy nurjerjo, kotřiž so runje na tón dźeń do hłubiny podachu. Wróćo na łuce Smolic statoka přewjedźechu pod přewodom šulskeje socialneje dźěłaćerki wšelake hry a team spěchowace zwučowanja a počachu prěnje přećelske styki wuwiwać. Wječor přeprosychu sej staršich na grilowanje a podachu so po chowanju słónca na nócne pućowanje.

Rjadowanja knjeni Bukoweje nóžkowaše pjatk z Worklec do Hornjeho Hajnka, hdźež sej dom Jurja Brězana bliže wobhlada. Wučerka předčita jim dopomnjenki Brězana wo jeho prěnim dnju w šuli. A šulerjo so na to wo tym rozmołwjachu, kak bě so jim prěni tydźeń na wyšej šuli zešło a što sej za přichod přeja. Měrćin Kral z Chrósćic dowjeze jich z konjacym zapřahom zaso wróćo do Worklec.

Po tym, zo běštej rjadowniskej wučerce prěni tydźeń za wobě rjadowni z tójšto rjanymi aktiwitami pjelniłoj, započa so za nowačkow 5. lětnika wšědny dźeń wuknjenja. Za to pak přejemy tež wšitkim tamnym šulerjam a wučerjam wjele wjesela a wuspěcha.

wobraz


tekst a foće: Franciska Zopic