Snowtropolis - sněhakowanje pod třěchu / Skifahren unter dem Dach  [01/2015]

„Z liftom na horu, horka čaj pić, spěšnje do doła. …“  Tutón spěw „Lózych hólcow“ klinči we wušomaj, kaž by za nas spisany był. Sněhaki  sej přičinić abo snowboard pod pažu wzać a z talerjowym liftom po sněze na horu jěć a z wotmachom zaso dele - to su zymske wjesela! A to wšo nutřka pod třěchu! Haj, to smy sej my, „wosomki“ Worklečan šule, popřeli. Běchmy mjenujcy w „sněhakowarskim lěhwje“ w Złym Komorowje. Tam wězo njejsu wysoke hory, ale tam steji sněhakowarska hala „Snowtropolis“. Po tym, zo dyrbješe so loni wjedra dla, dwójce naše sněhakowarske lěhwo w čěskim Bedřichovje wotprajić, smy sej lětsa 100% wěstu, wot wjedra njewotwisnu, wariantu organizowali. To bě na našej šuli tak rjec premjera. Hala  poskićuje za šulske rjadownje tak mjenowane „dny w sněze“. K tomu słuša wupožčenje sněhakow, črijow a nahłownika, wužiwanje lifta, kaž tež zastaranje a přenocowanje w dowolowych domčkach. Wot wustojnych a nazhonitych wučerjow nawuknychmy zakłady sněhakowanja abo jězdźenja ze snowboardom. Wotjězd z hory w hali po kumštnym sněze je někak 130 m dołhi. Cyłe wuhotowanje hale je napodobnjene sněhakowarskim centeram we wysokich horach, tak zo móžeš zdźěla woprawdźe začišć dóstać, zo sy něhdźe w Alpach. Wšitcy smy nawuknyli na sněhakach abo na snowboardźe z hory dele jěć a na kóncu přewjedźechmy hišće małe wubědźowanje, kotrež su naši hólcy dobyli . Woni móžachu ze snowtropolis-pokalom domoj jěć. W swobodnym času pobychmy w Zły Komorowskej kupjeli, w lodowej hali  so smykać a na bowlingu. Přijomne bě, zo wšitke tute atrakcije dokoławokoło sněhakowar-skeje hale leža. Kaž přeco, hdyž je rjenje, so čas přespěšnje minje. Spokojni a kusk hordźi na so wróćichmy so po tutych rjanych dožiwjenjach zaso domoj.

foto a tekst: K. Bukowa