Projekt k powołanskej orientaciji - Projekt zur Berufsorientierung [12/2015]
Šulerjo 8. lětnika Worklečanskeje wyšeje šule wopytachu srjedu, 2.12.15, serbske firmy a zarjady. Tak běštej holcy w Serbskim ludowym ansamblu, hdźež zeznajomištej zo z powołanjom šwalče a zhotowjerki maskow (Maskenbildnerin) bliže. Tež w serbskim hosćencu „Wjelbik“ w Budyšinje šulerjej dopołdnja sobu warištaj.
Dalši šulerjo wopytachu Wjeńkec blidarnju we Wotrowje, skótnolěkarsku praksu w Pančicach, Brühlec lakěrarnju w Smječkecach, starownju „swj. Ludmile“ w Chróšćicach, Zahrodnikec pjekarnju w Chróšćicach, metal předźěłacy zawod w Miłoćicach a Šustrec elektrofirmu w Kamjencu. Woni wjedźechu ze zamołwitymi sobudźěłaćerjemi interviewy a mějachu zwjetša tež móžnosć, w firmach sobu podźěłać.
Projekt nasta na iniciatiwu Rěčneho centruma WITAJ a je so zhromadnje ze serbskej wyšej šulu Worklecy přewjedł. Wutrobny dźak za podpěru!
Zaměr je, zo zeznaja šulerjo jednotliwe powołanja w serbskich firmach/zarjadach bliže a zo wuzwola sej klětu kónc šulskeho lěta po móžnosći tež w serbskej wokolinje městno za šulerski praktikum.
RCW je wudał lětsa dwurěčnu dokumentacisku mapu, kiž słuži k powołanskej orientaciji. W njej rozprawjeja Worklečanscy šulerjo wo tym, kak su loni prěni raz serbske firmy wopytali a kotre powołanja su bliže zeznali. Mapa z tekstami a fotami ma so nětko dale wudospołnić. Wona słuži jako přidatny wučbny material a je wučerjam a šulerjam we wšěch serbskich wyšich šulach k dispoziciji.
Error
foto a tekst: B. Wjeńcyna